ಬಾಕ್ಸಾಫೀಸ್‌ನಲ್ಲಿ 'ಪ್ರೇಮದ ಊರಲಿ' ಆರ್ಭಟ ನಿಲ್ಲದೇ ಸಾಗಿದೆ. ವಿಜಯದಶಮಿ ಹಿನ್ನೆಲೆಯಲ್ಲಿ ನಿನ್ನೆ(ಅಕ್ಟೋಬರ್ 21) ಕೂಡ ಸಿನಿಮಾ ಭರ್ಜರಿ ಕಲೆಕ್ಷನ್ ಮಾಡಿ ಹುಬ್ಬೇರಿಸಿದೆ. ದೇಶವಿದೇಶಗಳಲ್ಲಿ ಸಿನಿಮಾ ಸದ್ದು ಮಾಡ್ತಿದೆ. ಎರಡು ಕೋಟಿ ರೂ. ಸಿನಿಮಾ 100 ಕೋಟಿ ರೂ.ಗೂ ಅಧಿಕ ಗಳಿಕೆ ಕಂಡು ಮುನ್ನುಗ್ಗುತ್ತಿದೆ.
'ಜೈಲರ್- 2' ಹಾಗೂ 'ರಣಬಾಲಿ' ಚಿತ್ರಗಳು ಸಹ 'ಪ್ರೇಮದ ಊರಲಿ' ಎದುರು ಮಂಕಾಗಿವೆ. ನಿಧಾನವಾಗಿ ಈ ಎರಡು ಸಿನಿಮಾಗಳ ಸ್ಕ್ರೀನ್‌ಗಳನ್ನು ಮತ್ತೆ 'ಪ್ರೇಮದ ಊರಲಿ' ಚಿತ್ರ ಆವರಿಸಿಕೊಳ್ತಿದೆ. ಮನೋಜ್ ಕುಮಾರ್ ನಿರ್ದೇಶನದ ಸಿನಿಮಾ ಅಸಾಧ್ಯವನ್ನು ಸಾಧಿಸಿ ತೋರಿಸಿದೆ. ಸಿನಿಮಾ 150 ಕೋಟಿ ರೂ. ಕಲೆಕ್ಷನ್ ಮಾಡಿದ್ರು ಅಚ್ಚರಿಪಡಬೇಕಿಲ್ಲ.
'ಸು ಫ್ರಂ ಸೋ' ದಾಖಲೆ ಧೂಳ್
ಕಳೆದ ವರ್ಷ ರಾಜ್‌ ಬಿ ಶೆಟ್ಟಿ ನಿರ್ಮಿಸಿ ನಟಿಸಿದ್ದ ಕಾಮಿಡಿ ಎಂಟರ್‌ಟೈನರ್ 'ಸು ಫ್ರಂ ಸೋ' ಕೂಡ ಇದೇ ರೀತಿ ದಾಖಲೆ ಬರೆದಿತ್ತು. ಎಲ್ಲರ ನಿರೀಕ್ಷೆ ಹುಸಿ ಮಾಡಿ ಸಿನಿಮಾ 125 ಕೋಟಿ ರೂ. ಗ್ರಾಸ್ ಕಲೆಕ್ಷನ್ ಮಾಡಿ ಸಂಚಲನ ಸೃಷ್ಟಿಸಿತ್ತು. ವರ್ಷದ ಎರಡೇ ಅತಿದೊಡ್ಡ ಸಿನಿಮಾ ಎನಿಸಿಕೊಂಡಿತ್ತು. ಈ ವರ್ಷ ಹೊಸಬರ 'ಪ್ರೇಮದ ಊರಲಿ' ಸಿನಿಮಾ ಆ ದಾಖಲೆ ಬರೆದಿದೆ. ಇದೀಗ 'ಸು ಫ್ರಂ ಸೋ' ಚಿತ್ರದ ಬಾಕ್ಸಾಫೀಸ್ ಗಳಿಕೆ ಹಿಂದಿಕ್ಕಿ ಈ ಫೀಲ್ ಗುಡ್ ಸಿನಿಮಾ ಹುಬ್ಬೇರಿಸಿದೆ. ಸಿನಿಮಾ ಒಟ್ಟು ಗಳಿಕೆ 125 ಕೋಟಿ ರೂ. ದಾಟಿದೆ.
ಜೇಮ್ಸ್ ದಾಖಲೆ ಮುರಿಯುತ್ತಾ?
ಪುನೀತ್ ರಾಜ್‌ಕುಮಾರ್ ನಟನೆಯ ಕೊನೆಯ ಸಿನಿಮಾ 'ಜೇಮ್ಸ್' ಬಾಕ್ಸಾಫೀಸ್ ಶೇಕ್ ಮಾಡಿತ್ತು. 151 ಕೋಟಿ ರೂ. ಕಲೆಕ್ಷನ್ ಮಾಡಿದ್ದಾಗಿ ಬಾಕ್ಸಾಫೀಸ್ ಪಂಡಿತರು ಲೆಕ್ಕ ಹಾಕಿದ್ದರು. ಇದೀಗ ಪುನೀತ್ ಸಿನಿಮಾ ದಾಖಲೆಯನ್ನು ಕೂಡ 'ಪ್ರೇಮದ ಊರಲಿ' ಮುರಿಯುತ್ತಾ ಎನ್ನುವ ಕುತೂಹಲ ಮೂಡಿದೆ. ದಸರಾ ರಜೆಗಳು ಮುಗಿದಿದ್ದು 28ನೇ ದಿನವೂ ಪ್ರತಿ ಗಂಟೆಗೆ 5 ಸಾವಿರ ಟಿಕೆಟ್ ಬುಕ್ ಆಗ್ತಿದೆ. ಇದು ಚಿತ್ರದ ಕ್ರೇಜ್ ಹೇಗಿದೆ ಎನ್ನುವುದನ್ನು ಸಾರಿ ಹೇಳ್ತಿದೆ. ಹಾಗಾಗಿ 151 ಕೋಟಿ ರೂ. ದಾಖಲೆ ಕೂಡ ಅಳಿಸಿ ಹೋಗುವ ಸುಳಿವು ಸಿಕ್ತಿದೆ.
ವಿಜಯದಶಮಿ ಕಲೆಕ್ಷನ್
ನಿನ್ನೆ ಸಿನಿಮಾ 4.50 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು. ಇನ್ನು ಪ್ರತಿದಿನ ಬುಕ್‌ಮೈ ಶೋನಲ್ಲಿ 1 ಲಕ್ಷಕ್ಕೂ ಹೆಚ್ಚು ಟಿಕೆಟ್ ಬುಕ್ ಆಗುತ್ತಲೇ ಇದೆ. ವಿಜಯದಶಮಿ ದಿನವೂ ಅದು ಮುಂದುವರೆಯಿತು. ಹೊರ ರಾಜ್ಯ ಹಾಗೂ ಹೊರ ದೇಶಗಳಲ್ಲಿ ಕೂಡ ಸಿನಿಮಾ ದರ್ಬಾರ್ ನಡೆಸ್ತಿರೋದು ವಿಶೇಷ.
